Apple បានបញ្ចេញ iOS 6.1.1 ជាផ្លូវការហើយ
កាលពីម្សិលមិញក្រុមហ៊ុន Apple បានបញ្ចេញ iOS 6.1.1 មកជាសាធារណះហើយ ដែល iOS 6.1.1 នោះមានសម្រាប់តែ iPhone 4S តែមួយម៉ូឌែលប៉ុណ្ណោះ ។ iOS 6.1.1 នោះគឺកែនូវបញ្ហា 3G រអាក់រអួលលើ iOS 6.1 ។ ប្រិយមិត្តប្រហែលជាមានការងឿងឆ្ងល់ខ្លះៗហើយថាតើ iOS 6.1.1 Jailbreak បានហើយរឺនៅ ? ក្រុម Hacker បានប្រកាសភ្លាមៗថា iOS 6.1.1 គឺអាច Jailbreak បានហើយ ដោយកម្មវិធីសម្រាប់ Jailbreak iOS 6.1.1 នោះគឺប្រើកម្មវិធី evasi0n 1.3 វេបសាយ http://evasi0n.com/ ។ សូមបញ្ជាក់ថាហ្វុនខ្មែរនិងក្តាចុចខ្មែរក៍មានផងដែរសម្រាប់ iOS 6.1.1 បង្កើតដោយក្រុមការងារ 4khmeriphoneteam ។ ឆ្លៀតឱកាសនេះក៍សូមអរគុណដល់ក្រុមការងារ 4khmeriphoneteam ផងដែរដែលបានចំណាយពេលដ៍មានតម្លៃ បង្កើតហ្វុនខ្មែរនិងក្តាចុចខ្មែរដល់សហគមខ្មែរយើងបានប្រើប្រាស់ដោយពុំគិតថ្លៃ ។
វិធីដំឡើងទៅកាន់ប្រព័ន្ធ iOS 6.1 និងវិធី Jailbreak វា ដោយប្រើ កម្មវិធី evasi0n
ប្រព័ន្ធ iOS 6.1 ដែលមនុស្សជាច្រើន បានរង់ចាំជាយូរមកហើយ ទីបំផុត បានចេញមកហើយ ហើយអាចប្រើបានជាមួយ iPhone 5, iPhone 4S, iPhone 4/3GS, iPad 2, iPad ថ្មី, iPad mini និង iPod Touch 4G/5G។ ដំណាលគ្នានេះដែរ ក្រុមមួយឈ្មោះ evad3rs ក៏បានចេញ កម្មវិធី evasi0n ដែលអាច Jailbreak បានទាំងម៉ាសីុន ដែលប្រើបន្ទៈឈីបចាស់ (A4) iPhone 4/3GS និងម៉ាសីុនដែលប្រើបន្ទៈឈីបថ្មីៗ (A5/A6) ដែលរួមមាន iPhone 5, iPhone 4S, iPad 2, iPad ថ្មី, iPad mini ជាដើម។ ខាងក្រោមនេះ គឺជា វិធីដំឡើងទៅកាន់ប្រព័ន្ធថ្មីនេះ ហើយលោកអ្នក ដែលនៅប្រើ ទ្រនាប់សីុមនៅឡើយ សូមធ្វើការដោះកូដ តាមរយៈ IMEI Unlock ដែលមានតំលៃប្រមាណពី $5-$15 មុននឹងដំឡើង ទៅវា ព្រោះពេលដំឡើងហើយ នឹងឡើង Baseband មិនខាន។ សំរាប់លោកអ្នក ដែលបាន ដោះកូដ តាមរយៈ IMEI ចូរកុំបារម្ភ ព្រោះក្រោយដំឡើងរួច ទូរស័ព្ទរបស់លោកអ្នក នឹងប្រើបានដូចធម្មតា។
វិធីដំឡើងទៅកាន់ iOS 6.1:
1. ជាដំបូង សូមដោនឡូដ និងដំឡើង កម្មវិធី iTunes ពីលីងខាងលើ បន្ទាប់មក ដោនឡូដ ឯកសារដំឡើង ទៅតាមប្រភេទ ឧបករណ៍របស់លោកអ្នក។ បន្ទាប់មក ភ្ជាប់ iPhone ទៅកាន់កុំព្យូទ័រ រួចបើកកម្មវិធី iTunes (លោកអ្នក ត្រូវមានអីុនធើណែត)។
នៅកូឡោនខាងឆ្វេង ក្រោមពាក្យ DEVICES សូមចុចលើ ឈ្មោះ iPhone របស់លោកអ្នក។ ចុច ឃី SHIFT សំរាប់ប្រព័ន្ធ Windows ឬ alt option សំរាប់ ប្រព័ន្ធ Mac OSX អោយជាប់ រួចចុច ប៊ូតុង Restore បន្ទាប់មក រំកិល ទៅកាន់ ទីតាំង ដែលបាន រក្សា ឯកសារ ដំឡើង។ ចុចរើសយក ឯកសារដំឡើងនោះហើយ រួចចុច ប៊ូតុង Open។
2. បន្ទាប់មក ចុចប៊ូតុង Restore រួចរង់ចាំ ប្រមាណពី កន្លះម៉ៅង ទៅមួយម៉ោង ទំរាំ ការដំឡើង បានចប់សព្វគ្រប់។
3. បន្ទាប់មក ចុចរើស Set up as a new iPhone រួចចុច ប៊ូតុង Continue-> Done ជាការស្រេច៕
4. បន្ទាប់មក នៅលើ iPhone សូមធ្វើការកំណត់ផ្សេងៗ នៅផ្ទាំងស្វាគមន៍ ជាការស្រេច៕
ក្រួសក្នុងតម្រងនោម
ប្រសិនជាលោកអ្នកទទួលទានអាហារមួយចំនួនដោយមិនមានការ ប្រុងប្រយ័ត្ន អាចបង្កឱ្យកើតមានក្រួសក្នុងតម្រងនោមបាន។ ដោយសារក្រួសក្នុងតម្រងជាផលវិបាកមួយ ដែលធ្វើឱ្យលោកអ្នកពិបាកក្នុងការបត់ជើងតូច។ ហើយជាប្រភេទជម្ងឺមួយដែលអាចបណ្ដាលឱ្យខូចតម្រងនោមរបស់លោកអ្នកបាន។ ដូចនេះប្រសិនជាលោកអ្នកមានបញ្ហាគួរតែប្រញាប់ប្រញាល់ទៅពិគ្រោះយោបល់ ជាមួយអ្នកដែលមានឯកទេសផ្នែកតម្រងនោមឱ្យបានរហ័សរហួន ប្រសិនជាលោកអ្នកមិនធ្វើការព្យាបាលទេ អាចបង្កការរំខានដល់ប្រព័ន្ធប្លោកនោម និងតម្រងនោមបាន។
ទស្សនាវដ្ដី សុខភាពយើង បានធ្វើកិច្ចសម្ភាសន៍ជាមួយលោកសាស្ដ្រាចារ្យជំនួយវេជ្ជបណ្ឌិត កែវ ណារិទ្ធ ឯកទេសផ្នែកជម្ងឺតម្រងនោម និងជាប្រធានមន្ទីរពហុព្យាបាលណារិទ្ធ បកស្រាយអំពីប្រធានបទក្រួសក្នុងតម្រងនោម ដើម្បីឱ្យលោកអ្នកនាងកញ្ញាបានជ្រាបកាន់តែច្បាស់អំពីបញ្ហានេះ។
ក្រួសក្នុងតម្រងនោមជាអ្វី?
ក្រួសក្នុងតម្រងនោមគឺជាជម្ងឺម្យ៉ាងដែលកើតមានក្នុងតម្រងនោម កើតមានឡើងដោយសារក្រាមតូចៗដែលបានប្រមូលផ្ដុំគ្នានៅក្នុងទឹកនោម បង្កើតបានជាដុំធំ ស្ថិតនៅផ្ទៃខាងក្នុងនៃតម្រងនោម។ ប្រសិនជាក្រួសនោះមានទំហំតូចៗ វានឹងធ្វើដំណើរចុះតាមបង្ហូរនោម ចេញមកក្រៅតាមទឹកនោម។ ប៉ុន្ដែផ្ទុយមកវិញប្រសិនជាវាមានទំហំធំ ឬធំជាងបង្ហូរទឹកនោម វាធ្វើឱ្យស្ទះលំហូរទឹកនោម ហើយបណ្ដាលឱ្យរំខានដល់មុខងារតម្រងនោម ឬក៏បណ្ដាលឱ្យលោកអ្នកឈឺចុកចាប់យ៉ាងខ្លាំង រហូតដល់តម្រូវធ្វើការព្យាបាលជាបន្ទាន់ក៏មានដែរ។
មូលហេតុបង្កក្រួសក្នុងតម្រងនោម
មូលហេតុដែលបណ្ដាលឱ្យកើតមានក្រួសក្នុងតម្រងនោមនេះគឺបណ្ដាលមកពី
- របបចំណីអាហារ ដូចជាទឹកដោះគោ សាច់សត្វ អំបិល សូកូឡា តែ…
- បរិភោគបានតិចតួចនូវបន្លែដែលមានជាតិសរសៃច្រើន
- ការទទួលទានទឹកមិនបានគ្រប់គ្រាន់
- កត្ដាតំណពូជ
- ទម្រង់មិនប្រក្រតីរបស់ប្រព័ន្ធទឹកនោមជាដើម។
ដូច្នេះដើម្បីបង្ការរាល់បញ្ហានេះ លោកអ្នកគប្បីចៀសវាងកាត់បន្ថយនូវរបបអាហារមួយចំនួនដូចបានរៀបរាប់ ខាងលើនេះ និងតម្រូវឱ្យទទួលទានទឹកឱ្យបានច្រើន។
រោគសញ្ញាក្រួសក្នុងតម្រងនោម
រោគសញ្ញាក្រួសកុ្នងតម្រងនោមទាក់ទងទៅនឹងទីតាំងក្រួសក្នុងតម្រងនោម និងទំហំ ហើយវាស្ថិតនៅក្នុងតម្រងនោម។ ចំពោះរោគសញ្ញាវិញមិនសូវជាមានអាការអ្វីធ្ងន់ធ្ងរប៉ុន្មានទេ គ្រាន់តែធ្វើឱ្យអ្នកជម្ងឺឈឺចុកចាប់នៅម្ដុំចង្កេះ។ ប្រសិនជាក្រួសនោះតូចៗវានឹងរមៀលធ្លាក់នៅ ក្នុងបំពង់បង្ហូរទឹកនោម ពេលនោះហើយដែលធ្វើឱ្យអ្នកជម្ងឺឈឺចុកចាប់ខ្លាំង រហូតទាមទារធ្វើការព្យាបាល ឬសង្គ្រោះជាបន្ទាន់ក៏មានដែរ។ តែប្រសិនជាវារមៀលធ្លាក់រហូតដល់ប្លោកនោម ឬធ្លាក់ដល់បង្ហួរនោមខាងក្រៅរបស់អ្នកជម្ងឺ វាធ្វើឱ្យស្ទះតម្រងនោម ហើយអ្នកជម្ងឺនោមអត់ចេញទេ។ រោគសញ្ញាដូចជាតឹងប្លោកនោមខ្លាំង មានអាការឈឺចុកចាប់នៅត្រង់ថ្ងាស ឬនោមអត់ចេញដោយសារតែក្រួស។
ផលប៉ះពាល់បណ្ដាលមកពីក្រួសក្នុងតម្រងនោម
ប្រសិនជាលោកអ្នកមិនធ្វើការព្យាបាល វាធ្វើឱ្យមានផលប៉ះពាល់ទៅដល់ប្លោកនោម បែកប្លោកនោម។ បើនៅតាមបំពង់បង្ហូរពីតម្រង នោមចូលប្លោកនោម វាធ្វើឱ្យចុកខ្លាំងរហូតធ្វើឱ្យខូចតម្រងនោម ឬក៏មានការរលាកដល់មុខងារតម្រងនោម ដូចនេះទាមទារនូវការព្យាបាល ប្រសិនជាលោកអ្នកមិនព្យាបាលវាធ្វើឱ្យខូចតម្រងនោមបាន។ ផលប៉ះពាល់នៃជម្ងឺក្រួសក្នុងតម្រងនោមដូចជាមិនច្រើនទេ តែប្រសិនជាលោកអ្នកទុកអាការនេះយូរវានឹងធ្វើឱ្យស្ទះលំហូរទឹកនោម និងរំខានដល់មុខងារតម្រងនោម ឬក៏បណ្ដាលឱ្យលោកអ្នកឈឺចុកចាប់យ៉ាងខ្លាំងរហូតដល់តម្រូវធ្វើការ ព្យាបាលជាបន្ទាន់ក៏មានដែរ។
វិធីព្យាបាលក្រួសក្នុងតម្រងនោម
សព្វថ្ងៃនេះដោយសារវិទ្យាសាស្ដ្រកាន់តែមានបច្ចេកវិទ្យាទំនើបទៅៗ ដូចនេះក្រួសក្នុងតម្រងនោមលែងជាបញ្ហាចោទដូចមុនទៀតហើយសម្រាប់ លោកអ្នក។ ប្រសិនជាក្រួសក្នុងតម្រងនោមមានទំហំតូចជាង២០សង់ទីម៉ែត្រ គឺមានឧបករណ៍បាញ់បំបែកពីខាងក្រៅខ្លួន ដោយរលកទង្គិច។ មធ្យោបាយនេះសព្វថ្ងៃមានអ្នកជម្ងឺរាប់លាននាក់នៅលើពិភពលោកបានទទួលការ ព្យាបាលរបៀបនេះ ទទួលបានជោគជ័យដល់ទៅជាង៨០ភាគរយឯណោះ។ ការព្យាបាលរបៀបនេះអ្នកជម្ងឺពុំចាំបាច់សម្រាកនៅមន្ទីរពេទ្យទេ និងមិនមានការឈឺចាប់ទៀតផង។
- ប្រសិនជាក្រួសមានទំហំតូចល្មម គេនឹងធ្វើការព្យាបាលដោយចូលទៅចាប់ និងបំបែកយកក្រួសចេញមកក្រៅតាមបំពង់ បង្ហូរទឹកនោមរបស់អ្នកជម្ងឺដោយពុំចាំបាច់វះកាត់ឡើយ។
- ប៉ុន្ដែប្រសិនជាក្រួសនោះមានទំហំធំលើសពី២០សង់ទីម៉ែត្រឡើងទៅ គឺគេព្យាបាលដោយចោះត្រង់ចង្កេះជារន្ធតូចមួយដើម្បីចូលទៅបំបែក និងចាប់យកក្រួសមកខាងក្រៅ។
- ជម្រើសវះកាត់យកក្រួសចេញជាជម្រើសសម្រាប់ក្រួសដែលមានទំហំធំ និងមានរាងដូចខ្ញី ឬច្រើនហើយធំៗ។
ដំបូន្មានរបស់អ្នកប្រឹក្សា
ប្រសិនជាលោកអ្នកមានបញ្ហាក្រួសក្នុងតម្រងនោម គួរតែប្រញាប់ប្រញាល់ទៅពិគ្រោះយោបល់ជាមួយអ្នកដែលមានឯកទេសផ្នែក តម្រងនោម ដើម្បីទទួលបាននូវមធ្យោបាយល្អក្នុងការព្យាបាល ពីព្រោះថាបច្ចុប្បន្ននេះមានការរីកចម្រើនយ៉ាងខ្លាំងណាស់ ផ្នែកវិទ្យាសាស្ដ្រ ជាពិសេសស្រុកខ្មែរឥឡូវក៏មានឧបករណ៍ទំនើបៗមិនចាញ់បរទេសប៉ុន្មានទេ សម្រាប់ការព្យាបាលក្រួសក្នុងតម្រងនោមនេះ។
ប្រភព ៖ ទស្សនាវដ្តី សុខភាពយើង លេខ០៦៨ ខែកញ្ញា ឆ្នាំ២០១១
ជម្ងឺអាឡែកស៊ីច្រមុះ
ការតឹងច្រមុះ រមាស់ច្រមុះ ហៀរសម្បោរ រមាស់ក្រអូមមាត់ រមាស់ក ឈឺក មានស្លេស្មច្រើន ឈឺក្បាល នេះអាចជារោគសញ្ញានៃជម្ងឺអាឡែកស៊ីច្រមុះ។ ជម្ងឺអាឡែកស៊ីច្រមុះនេះ គេសង្កេតឃើញថា២ភាគ៣នៃអ្នកជម្ងឺ ច្រើនតែកើតមានឡើងមុនអាយុ៣០ឆ្នាំ ហើយក្មេងៗឧស្សាហ៍កើតជាងមនុស្សចាស់។ ជម្ងឺនេះភាគច្រើនបង្កឡើងដោយសារបរិស្ថាន ឬអាចបណ្ដាលមកពីតំណពូជក៏ថាបាន។
ទស្សនាវដ្ដី សុខភាពយើង បានធ្វើកិច្ចសម្ភាសន៍ជាមួយលោកវេជ្ជបណ្ឌិត ប្រាក់ ស៊ីថា ឯកទេសច្រមុះបំពង់កត្រចៀក នៅមន្ទីរពេទ្យព្រះអង្គឌួង លោកនឹងធ្វើការបកស្រាយអំពីប្រធានបទជម្ងឺអាឡែកស៊ីច្រមុះ ដើម្បីឱ្យលោកអ្នកនាងកញ្ញាបានជ្រាបកាន់តែច្បាស់អំពីបញ្ហានេះ។
ជម្ងឺអាឡែកស៊ីច្រមុះជាអ្វី?
ជម្ងឺអាឡែកស៊ីច្រមុះគឺជាប្រភេទជម្ងឺដែលបណ្ដាលមកពីការរលាក ច្រមុះ ឬផ្លូវដង្ហើមលើ ដោយសារសារធាតុផ្សេងៗ ជាពិសេសសារធាតុដែលមានក្នុងខ្យល់ធូលី លម្អងផ្កា ដែលគេហៅថា អាឡែកស្សែន។ នៅពេលដែលមនុស្សបញ្ចេញនូវគ្រឿង ការពារដែលហៅថាអង់ទីគ័រ ដើម្បីប្រឆាំងទប់ទល់នឹងអាឡែកស្សែនដែលមាននៅក្នុងខ្យល់រួចក៏បង្កើតបាន ជាជម្ងឺអាឡែកស៊ីច្រមុះនេះតែម្ដង។
មូលហេតុបង្កអាឡែកស៊ីច្រមុះ
មូលហេតុដែលបណ្ដាលឱ្យលោកអ្នកកើតមានជម្ងឺអាឡែកស៊ីច្រមុះនេះដោយសារតែកត្ដាធំៗពីរគឺ ៖
1 . តាមរដូវកាល ដល់ពេលមានការផ្លាស់ប្ដូររដូវទើបមានអាឡែកស៊ីច្រមុះកើតមានឡើង ហើយច្រើនតែកើតមានឡើង ដោយសារការចេញលម្អងផ្កា ឬលម្អងឈើផ្សេងៗជាដើម។
2 .មកពីធូលី រោមសត្វ តំណពូជ និងសារធាតុផ្សេងៗ ដែលមាននៅក្នុងផ្ទះរបស់លោកអ្នក ជាហេតុដែលធ្វើឱ្យលោកអ្នកកើតមានជម្ងឺអាឡែកស៊ីច្រមុះបាន។
រោគសញ្ញា និងរោគវិនិច្ឆ័យជម្ងឺអាឡែកស៊ីច្រមុះ
រោគសញ្ញាដែលបង្ហាញឱ្យដឹងថាជាជម្ងឺអាឡែកស៊ីច្រមុះ មានដូចជាក្អកក្រដាសច្រើននៅពេលព្រឹក តឹងច្រមុះ រមាស់ច្រមុះ ហៀរសម្បោរ ហើយការហៀរសម្បោរដំបូងជាទឹកថ្លា ក្រោយមកអាចទៅជាខាប់។ ការខាប់ដោយសារតែមានការរលាកបន្ថែម វាធ្វើឱ្យរមាស់ភ្នែក រមាស់ក្រអូមមាត់ រមាស់ក ឈឺក អាចមានស្លេស្មច្រើន អាចមានឈឺក្បាល នេះសុទ្ធសឹងជារោគសញ្ញាជម្ងឺអាឡែកស៊ីច្រមុះ។
ក្នុងការធ្វើរោគវិនិច្ឆ័យត្រូវសាកសួរអំពីប្រវត្ដិរបស់អ្នកជម្ងឺ ថាតើគាត់ចាប់ផ្ដើមធ្វើទុក្ខនៅពេលណា នៅកន្លែងណា។ ហើយការធ្វើទុក្ខនៅតាមរដូវ ឬក៏ធ្វើទុក្ខរាល់ថ្ងៃ ហើយការធ្វើទុក្ខដូចបានរៀបរាប់ខាងលើនេះដែរឬអត់។ ប៉ុន្ដែជួនកាលរោគសញ្ញារបស់អ្នកជម្ងឺអាចធ្វើឱ្យលោកអ្នកដឹងថាជាជម្ងឺ អាឡែកស៊ីបាន ជួនកាលអាចពិនិត្យ ហើយការពិនិត្យនេះត្រូវពិនិត្យទៅលើមាត់ បំពង់ក ត្រចៀក ជាពិសេសច្រមុះអាចមានបញ្ហាសើម រីក ឬមានដុះសាច់ក្នុងច្រមុះ ដែលហៅថាឫសដូងច្រមុះ ឬក៏មានបញ្ហាខ្លះៗ ដូចជាវៀច ខ្ទង់ច្រមុះជាដើម។ ការវៀចខ្ទង់ច្រមុះនេះមិនមែនធ្វើឱ្យមានអាឡែកស៊ីទេ គ្រាន់តែថាមានការវៀចខ្ទង់ច្រមុះផង និងអាឡែកស៊ីផង វាធ្វើឱ្យអ្នកជម្ងឺពិបាកក្នុងការដកដង្ហើម។ កត្ដាភាគច្រើនដែលទាក់ទងនឹងអាឡែកស៊ីច្រមុះ សំខាន់ជាងគេគឺបណ្ដាលឱ្យកើតមានជម្ងឺឫសដូងច្រមុះទៅថ្ងៃក្រោយ។ ក្នុ្នងការធ្វើរោគវិនិច្ឆ័យផ្សេងៗទៀត ដូចជាការធ្វើតេស្ដនៅលើស្បែកអ្នកជម្ងឺ ឬមួយក៏ធ្វើតេស្ដ ដោយយកឈាមទៅពិនិត្យក៏បានហើយមានប្រសិទ្ធភាពជាង។
ផលប៉ះពាល់របស់ជម្ងឺអាឡែកស៊ីច្រមុះ
ផលប៉ះពាល់នៃជម្ងឺអាឡែកស៊ីច្រមុះគឺមានច្រើន ប្រសិនជាលោកអ្នកមិនយកចិត្ដទុកដាក់ក្នុងការព្យាបាលទេអាចមានផលវិបាក ជាមិនខាន។ ឧទាហរណ៍ករណីការរលាកច្រមុះ ហើយការរលាកច្រមុះអាចធ្វើឱ្យរលាកដល់ទីនីស ព្រោះទីនីសគឺជាឆ្អឹងប្រហោងក្នុងដែលស្ថិតនៅជុំវិញច្រមុះរបស់មនុស្ស ដែលមានទីនីសច្រើន មានដូចជានៅថ្គាម ថ្ងាស នៅចន្លោះភ្នែកច្រមុះ និងស្ថិតពីក្រោយច្រមុះ។ នៅពេលដែលមានការរលាកច្រមុះ ឬរលាកទីនីសអាចធ្វើឱ្យកើតជាឫសដូងច្រមុះ ដែលអាចប៉ះពាល់ទៅដល់ត្រចៀក រហូតធ្វើឱ្យរលាកត្រចៀកកើតជាអំបៅអំបែក អាចប៉ះពាល់ដល់ភ្នែក ប៉ះពាល់ទៅដល់សើស្បែក បង្កទៅជាកន្ទាលក្រហម ជាំ ជួនកាលអាចកើតជាហឺតបានដែរ។ មិនត្រឹមតែប៉ុណ្ណឹងទេ កាលណាដែលលោកអ្នកកើតមានជម្ងឺនេះ វាអាចធ្វើឱ្យមានផលប៉ះពាល់ទៅដល់ការងារប្រចាំថ្ងៃ ការសិក្សារៀនសូត្រ ព្រោះវាធ្វើឱ្យលោកអ្នកអស់កម្លាំង ឈឺក្បាល ទទួលទានដំណេកមិនបាន ហើយផលវិបាកមួយទៀតគឺខាងថវិកាទៀត។
វិធីការពារជម្ងឺអាឡែកស៊ីច្រមុះ
វិធីការពារដើម្បីទទួលបានប្រសិទ្ធភាពបំផុតនោះ លោកអ្នកគួរចៀសវាង មិនត្រូវប៉ះពាល់ឬស្រូបនូវសារធាតុផ្សេងៗ ដែលបង្កឱ្យកើតជម្ងឺអាឡែកស៊ីនេះ។ ពេលចេញដើរទៅណាមកណាត្រូវពាក់ម៉ាសការពារឱ្យបានខ្ជាប់ខ្ជួន នៅផ្ទះត្រូវបិទបង្អួចដើម្បីកុំឱ្យសារធាតុផ្សេងៗ ឬធូលីចូលបានតាមរយៈខ្យល់ ត្រូវសម្អាតផ្ទះឱ្យបានស្អាតបាត។ ហើយសម្រាមនៅពេលដែលលោកអ្នកបោសត្រូវខ្ចប់ឱ្យបានត្រឹមត្រូវ ជាពិសេសត្រូវមានអនាម័យខ្លួនជានិច្ច។
ដំបូន្មានរបស់អ្នកប្រឹក្សា
ដើម្បីរក្សាសុខភាពឱ្យបានល្អ លោកអ្នកត្រូវចៀសវាងនូវប្រការខ្លះៗដូចបានរៀបរាប់ខាងដើម និងកត្ដាមួយចំនួនទៀត ដូចជាត្រូវចៀសវាងនូវសារធាតុផ្សេងៗដែលធ្វើឱ្យលោកអ្នកកើតអាឡែកស៊ី និងត្រូវមានអនាម័យតាំងពីការបោស ទុកដាក់សម្រាមការសម្អាតទីលំនៅសព្វគ្រប់បែបយ៉ាងទាំងអស់។
បច្ចុប្បន្ននេះប្រទេសកម្ពុជាមានថ្នាំសម្រាប់ព្យាបាលដោយខ្លួនឯងបាន ប៉ុន្ដែក្នុងករណីខ្លះលោកអ្នកមិនត្រូវព្យាបាលដោយខ្លួនឯងទេ ត្រូវតែទៅជួប និងពិគ្រោះយោបល់ជាមួយគ្រូពេទ្យជំនាញទើបជាការប្រសើរ។
ប្រភព ៖ ទស្សនាវដ្តី សុខភាពយើង លេខ០៦៨ ខែកញ្ញា ឆ្នាំ២០១១
វិធីថែទាំសុខភាពរបស់អ្នកជម្ងឺលើសឈាម
មនុស្សភាគច្រើនកើតជម្ងឺលើសឈាមដោយមិនដឹងខ្លួនជាច្រើន ឆ្នាំ។ ព្រោះថាការលើសឈាម ឬសម្ពាធឈាមលើស ជួនមិនបង្ករោគសញ្ញាឬវិបត្ដិអ្វីទាំងអស់ អ្នកជម្ងឺមានសភាពធម្មតា។ ប៉ុន្ដែគាត់អាចមានរោគសញ្ញាខ្លះដែលស្ដែងឡើង ដូចជាឈឺក្បាលនៅពេលយប់ ឬពេលងើបពីការទទួលទានដំណេកនៅពេលព្រឹកព្រលឹម ហ៊ឹងត្រចៀក អស់កម្លាំងគ្មានមូលហេតុ ឬវិលមុខជាដើម។ បើសិនជាលោកអ្នកដែលកើតជម្ងឺលើសឈាម មិនបានមកធ្វើការព្យាបាលឱ្យបានទាន់ពេលទេនោះ លោកអ្នកអាចនឹងជួបនូវបញ្ហាធ្ងន់ធ្ងរជាច្រើន ដូចជាជម្ងឺបេះដូង ជម្ងឺខ្សោយតម្រងនោម ដាច់សរសៃឈាមក្នុងខួរក្បាលជាដើម។ លើសពីនេះជម្ងឺលើសឈាមអាចបាត់ជីវិតថែមទៀតផង បើសិនជាលោកអ្នកមិនបានធ្វើការថែទាំសុខភាពឱ្យបានដិតដល់នោះ។
ទស្សនាវដ្ដី សុខភាពយើង ជួបជាមួយលោកវេជ្ជបណ្ឌិត សេង សេរី ឯកទេសជម្ងឺទឹកនោមផ្អែមនៅមន្ទីរពេទ្យព្រះកុសុមៈ និងប្រាប់ពីវិធីនៅក្នុងការថែទាំសុខភាពរបស់អ្នកជម្ងឺលើសឈាម ដើម្បីឱ្យលោកអ្នកជ្រាប និងយល់ឱ្យកាន់តែច្បាស់អំពីបញ្ហានេះ។
ជម្ងឺលើសឈាម
ជម្ងឺលើសឈាមគឺជាសម្ពាធឈាមនៅក្នុងខ្លួនរបស់មនុស្សឡើងខ្ពស់ខុសពី ធម្មតា ដែលអាចធ្វើឱ្យសរសៃឈាមក្នុងខួរក្បាល ស្ទះឬដាច់ អាចធ្វើឱ្យមនុស្សយើងស្លាប់មួយចំហៀងខ្លួន។ ហើយនៅពេលដែលសម្ពាធឈាមឡើងខ្លាំង អាចធ្វើឱ្យគាំងបេះដូងស្លាប់ភ្លាមៗតែម្ដង។ កាលណាសម្ពាធឈាមឡើងខ្លាំងក៏អាចធ្វើឱ្យបែកសរសៃឈាមនៅក្នុងភ្នែក ខ្សោយតម្រងនោមជាដើម។
វិធីថែទាំសុខភាពរបស់អ្នកជម្ងឺលើសឈាម
ជម្ងឺលើសឈាមគឺទាមទារការថែទាំ និងការព្យាបាលអស់មួយជីវិត ហើយចំពោះវិធីថែទាំសុខភាពរបស់អ្នកជម្ងឺលើសឈាមមានបីវិធីដូចជា ៖
1 . របបអាហារ ៖ អ្នកជម្ងឺត្រូវកាត់បន្ថយចំណីអាហារណាដែលសម្បូរទៅដោយសារជាតិប្រៃ ជាតិស្ករ មិនត្រូវទទួលទានផ្អែមពេក។ ហើយសូមកាត់បន្ថយអាហារដែលសម្បូរទៅដោយជាតិខ្លាញ់ច្រើនពេក ត្រូវទទួលទានបន្លែ និងផ្លែឈើឱ្យបានច្រើន។
2 . ការធ្វើលំហាត់ប្រាណ ៖ ការធ្វើលំហាត់់ប្រាណ ដូចជាការដើរលឿនប្រមាណជា៣០នាទីនៅក្នុងមួយថ្ងៃឱ្យបានជាប្រចាំ វាមានសារៈប្រយោជន៍ខ្លាំងណាស់នៅក្នុងការជួយធ្វើឱ្យអ្នកជម្ងឺលើសឈាម មិនសូវឡើងទម្ងន់ខ្លាំង អាចជួយឱ្យសម្ពាធឈាមចុះបាន។
3 . ឱសថព្យាបាល ៖ អ្នកជម្ងឺត្រូវតែទទួលទានថ្នាំឱ្យបានទៀងទាត់ទៅតាមគ្រូពេទ្យណែនាំ មិនត្រូវធ្វេសប្រហែសឡើយ។ ត្រូវធ្វើការណាត់ជួបជាមួយគ្រូពេទ្យជារៀងរាល់១ខែម្ដងឬ៣ខែម្ដង ដើម្បីប្រើថ្នាំ។ សូមចៀសវាងការប្រើថ្នាំឱ្យខ្លួនឯងផ្ទាល់។
វិធីការពារជម្ងឺលើសឈាម
ដើម្បីចៀសវាងការកើតជម្ងឺលើសឈាម លោកអ្នកមិនត្រូវទទួលទានស្រា បារីច្រើនហួសកំណត់នោះទេ(បន្ដិចបន្ដួចបាន) មិនត្រូវទទួលទានប្រៃពេក។ ហើយត្រូវថែរក្សាទម្ងន់កុំឱ្យធាត់ពេក ត្រូវកាត់បន្ថយនូវភាពមួម៉ៅ តានតឹង។ ហើយត្រូវចេះសម្រួលអារម្មណ៍ខ្លួនឯងកុំឱ្យឆាប់ខឹងច្រើនពេក។
ដំបូន្មានអ្នកជំនាញ
នៅកម្ពុជា ជម្ងឺលើសឈាមកើតមានច្រើនគួរឱ្យកត់សម្គាល់។ ជម្ងឺនេះកើតនៅលើប្រជាជនដែលចូលចិត្ដទទួលទានប្រៃពេក។ ដូច្នេះហើយលោកអ្នកដែលមានអាយុចាប់ពី៣០ឆ្នាំទៅ៤០ឆ្នាំ មិនគួរទម្លាប់ទទួលទានអាហារប្រៃពេក ផ្អែមពេក ឬខ្លាញ់ ច្រើនពេកនោះទេ។ លោកអ្នកមិនត្រូវមើលស្រាលចំពោះជម្ងឺលើសឈាមនោះទេ។
ប្រភព ៖ ទស្សនាវដ្តី សុខភាពយើង លេខ០៦៩ ខែតុលា ឆ្នាំ២០១១
គុណឪពុកម្តាយ
ច្រៀងដោយ ឆាយ វីរៈយុទ្ឋ